بیر کوچه‌دن کئچیردی جلالیله شهریار
های– کوی اوجالدی، اولدو او گون شنلیک آشکار
وئردی سوال، داغلی یئتیم اؤز هاماشینا
بو گؤز قاماشدیران نه‌دی شاهین تاجیندا وار؟
وئردی جواب: بیلمیرم، آنجاق ائشیتمیشم
ارزشلی اینجی‌دیر باشا قویموش او بختیار
گئتدی قاباغه بیر قاری عورت، دئدی بئله:
گؤز یاشی‌دیر! اورک قانی‌دیر، اولسان هوشیار
بو قورد کی، بیزلره تانیش اولموش بیر عؤموردور
دایم فلاکته سورونو ائیله‌ییب دوچار
عارف کی ییغدی ثروت و دولت ”حرامی“ دیر
بیر شاها کی، مولک آل – وئر ائده ائتمه اعتبار
دقتله گؤر یئتیم‌لرین قانلی گؤز یاشین
بو گوهرین پاریلداماغین آنلا کم عیار
”پروین“ یالان دئینلره دوز سؤز نه بهره‌سی
کیمدیرکی دوز دانیشماغینا ائتسین افتخار؟
