شرقی آذربایجانین یئنی استانداری: اورمو گولونو یئنی دن جانلاندیراجاغیق / آذری تورکجه سینین دیل و ادبیات ائوی قورولماسی منیم بورجومدور

آی نیوزون وئردیی خبره گوره، دکتر اسماعیل جبارزاده بوگون آخشام شرقی آذربایجان والیسینین معارفه مراسیمینده دئدی: آذربایجانین یاشاییش محیطی و مدنی میراثی اولان اورمو گولونون جانلاندیرماسی دولتین ایش سیاهه سینده دیر و آذربایجان والیلیگینین ده بیرینجی اهمیتلی ایشلریندن اولاجاقدیر.

شرقی آذربایجان والیسی جمهور باشقانی دکتر حسن روحانی نین اورمو گولو حاقینداکی سوزلرینی خاطیرلاداراق دئدی: حورمتلی جمهور رئیسی یئنی دولتین بیرینجی جلسه سینده اورمو گولونون یئنی دن جانلاندیریلماسینی وورغولامیشدیلار. بو ایش انرژی ناظیرلیگی و یاشام محیطی نی حفظ ائدن تشکیلات لا آذربایجان اهالیسینین همتینه ایله یئرینه گئده جک دیر.

جبارزاده ایران اسلام جمهوریتینین جمهور باشقانینین آذربایجان اهالیسینیه وئردیی سوزه اشاره ائدیب دئدی: آذری تورکجه سینین دیل و ادبیات ائوی قورولماسی منیم بورجومدور، و دکتر روحانی وعده وئردیی اوچون بو تشکیلاتین قورولماسینا بوتون گوجوموزله چالیشاجاغیق.

شرقی آذربایجان والیسی آذربایجان تورکجه سینین استادلاری، دوشونورلری و متخصص لریندن اونا بو تشکیلاتین قورولماسیندا دستک اولمالارینی ایسته دی.

شرقی آذربایجان والیسی اوزونون باشقا اونملی ایشلریندن بیرینی ده سرمایه صاحیب لرینین شرقی آذربایجاندا یاتیریم و سرمایه یاتیرتمالارینین آسانلاشدیرلماسینی بیلدیردی.

جبارزاده سوزلرینین سون بولومونده دئدی: شرقی آذربایجاندا یاشاییش و ایش شرایطینی یاخشیلاشدیراراق بورادان کوچن اینسانی و مادی سرمایه لرین کوچمه سینین قارشیسینی آلاجاییق.