تبریز گؤیلرینین حیکایه سی

گؤزل و تاریخی تبریز، شهر باغی، بیرینجی لر شهری بو گون پیس دورومدا توز- توپراقلی بولودلار آلتیندا قالیب و دومانلی تبریز شانلیغینی توستولو تبریزه وئریب دیر.

او گونلرکی محمدسعید اردوبادی دومانلی کلمه سینی تبریز آدینین یانیندا کیتابینا سئچدی بلکه ده خاطیرینه هئچ گلمزدی کی دومانلی تبریز یئرینی توستو وورموش شهره وئره جک.

او شهرکی رنگلی و رنگسیز بوللو منوکسید ، دی اکسید و … اکسیدلر آلتیندا چتین لیکله نفس چکیر و چالیشیر بو آجی ظولوملردن جان قورتارسین.

هاوا چیرکلییینین سؤزو بیزیم اؤلکه یه هابئله اینکیشاف ائدن اؤلکه لرده تازا دئییل. چئشیدلی یاناجاقلارین زهرلی ماده لری، انرژی تلفاتی، آوتوموبیللرین گونو- گوندن چوخالماسی و کئیفییتلرینده گونو- گوندن آزالماسی بیزی بو اولایلارا توشلاندیریر.