چالالار شهری!

نئچه ایل لر دیر کی تبریزلی لر آیری شهرلره گئدنده، او یئرلرین آسفالتین تبریزینن مقایسه ائلرلر، ائلدیخجن ده اورک لری توتولار.
چه پیاده اولاسیز چه فرمان دالیسیندا، فرقی یوخدو. هامی بیلیر کی خیابان لارین آسفالتین وضعیتی یاخجی دییر کی چوخدا پیس دی. آسفالتین یئره یاتماسی، سینماسی، درین چالالار، قالخیب یئنن و دوز اولمیان آسفالت و… . شاید بعضی لری بو سؤزلردن اینجیه، اما هر نه اولسا بو شهرین آسفالت وضعیتی اصلا یاخجی دییر.
نئچه سری گؤرولوب خیابان دا آسفالت جیریلیب یا دا کلا سینیب اوغولوب؛ ایچنده بالاجادان یئکیه چالالار دوزلیب و یا بؤیوک تیکه لری آیریلیب؛ بولار دا سبب اولوب خیابان دا طبیعی اولمیان سرعت گیرلر دوزله. ائله بو مسئله یه باخیب، بیرده ماشین لارین سرعتین نظرده آلساخ، دئماخ اولار کی چوخلو تصادف لاردادا اسفالتین قولای اولماسینین تاثیری اولا بیلر. اما هر نقدر آز یا چوخ تاثیر قویسادا، هر ایل ائله بوجوردی کی وار، حتی تاپ تازا آسفالت تؤکولنده ده، بیر ایل صورا گئنه همن بو تزه آسفالت جیریلیب اوغولور.
آما گؤرسن نیه؟

تبریزده ایشلنیلن عمرانی ایش لر استاندارد دییر
“تبریز شهرداری سینین مسئول لاریندان بیری دئییر: عمرانی ایشلرین چوخو تبریزده استاندارد و عقل اوزوندن دییر.
سیدکاظم زعفرانچیلر دئییر: تکجه آسفالت دییر، آیری ایشلرده ده گرک چالیشاخ استاندارد حدینده ایشلیخ.
او آرتیریز: بتن تؤکمخ دن تا جدول چکمه یه جن ایشلریمیزین ایرادی وار و بئله اولور کی زمان گئشدیخجن عمرانی ایشلر آرادان گئدیب ضعیف لیرلر.
زعفرانچیلر آرتیردی: گرک چالشاخ ایشلریمیزین هامیسی دوز اولسون، اَن سون استانداردلاری دا گؤزده آلیب ایشلدیخ.
تبریزده یاشیان لارین چوخو آسفالتین وضعیتیندن گیلیلی دیلر. ائله کی نئچه هفته قاباخ دا بایرام سفرلرینده بو سؤزلری لوغاز ائلیب، اینترنت ده دئییردیلر کی: ”بیزیم استانا گلین اما تبریزین ایچینده گیرمیین کی آسفالتی قولایدی“ یا بونا تایی کنایه لر.

تبریزده آسفالتین وضعی چوخ قولای دی
تبریزین اسلامی شوراسی نین باشی دئدی: تبریزده آسفالتین وضعی چوخ قولای دی.
رسول برگی بو باره ده آرتیردی: خیابان لارین آسفالتی، تبریزده یاشیان لارین رضایتینده چوخ اؤنملی تاثیری وار. اما کوچم آیلاردا، هوانین وضعیتینه گؤره آسفالت لار سینیب، قوپوبو و بعضی یئرلرده باتیب یئره، بودا بالاجادان بؤیوکه چوخلو چالالار دوزلدیب. گل گئت ائلین لر ده بو وضعیته گؤره اذیت چکیرلر.
هر ایل نئچه میلیاردلار سرمایه اولونور تا شهرده آسفالت چکیلسین، اما هئچ کسی دئمیر کی بو آسفالت لار نئچه ایل دوام گتیرجخ دیر، یا اصلا نیه گرک شهرده دائماً آسفالت قوپارداخ آسفالت تؤکخ هر ایل؟ آسفالیتین قولای اولماسی، سبب اولور ماشین لار دا چوخلو قاباخلیخدان خرج آچالار، بعضا تصادف لرده ائله بونا گؤره اولور اما هئچ کس اهمیت وئرمیر بو خرج لر که جماعتین الینه آسفالت اوزوندن قوبولور، مسئولو کیمدی./*ت: مالک عباسی