تبریز بلدیه رئیسی، جبار باغچه‌بانین قیزی ایله گؤروشدو
یعقوب هوشیار تبریز بلدیه رئیسی : ثمینه باغچه‌بان ایله گوروشده اونون حیاتینین مستند فیلمینی چکمگه حاضیر اولدوقلارینی دئدی.
آی نیوز – تهران دا صمیمی بیر گؤروشده، تبریز بلدیه رئیسی یعقوب هوشیار، ایرانین ایلک اوشاق باغچاسی و ایلک ائیشتمزلره مخصوص اولان مدرسه‌نین قوروجوسو جبار باغچه‌بانین قیزی ثمینه باغچه‌بان ایله گؤروشدو.
شهریار سایتینین خبرینه گؤره، تبریز بلدیه رئیسی بو گؤروشده ثمینه باغچه‌بان ایله گؤروشوندن چوخ راضی اولدوغونو بیلدیریب دئدی: سیزین تهراندا اولدوغونوزو ائشیتدیکدن سونرا، سیزی گؤرمه‌یی اؤزومه بورج بیلدیم. سیز و عزیز آتانیز جبار باغچه‌بان، تکجه تبریز تاریخینده دئییل، آذربایجان، ایران و حتی دونیانین تاریخینده اؤزل بیر یئر توتورسوز.
او علاوه ائتدی: جبار باغچه بان ائشیتمز اوشاقلار اوچون مدرسه قورماقلا، توپلومون بو قروپونون تعلیمی‌نده بیر اینقلاب یاراتدی و تبریزین آدینی دونیادا تانیتدی. بو افتخار تبریز و ایران اوچون همیشه قالاجاق.
هوشیار، تبریزنین اؤزل خوصوصیتلرینه ایشاره ائدیب دئدی: تبریز همیشه بیرینجی لری یاراتماقدا اؤنده گدن بیر شهردیر و سیز و بؤیوک کیشی جبار باغچه بان بو یولدا اونده گئدن لردن ایدینیز.
او علاوه ائتدی: تبریز بؤیوک و تأثیرلی شخصیتلره افتخار ائدیر و همیشه تاریخینده آتانیزی بیر بؤیوک افتخار اولاراق خاطیرلایاجاق.
تبریز بلدیه رئیسی داها سونرا ثمینه باغچه‌بانین “تبریزین زنده نامان” مراسمینده تقدیر ائدیلمه‌سینی تکلیف ائتدی و دئدی: تبریز اؤزونون مدنی فضاسی ایله سیزین اوچون انرژی و ایلهاملا دولو بیر یئر اولا بیلر.
او، خانم باغچه‌بان‌دان تبریزه گلمک و بو احتشاملی مراسم ده اوندان تقدیر ائدیلمه‌سی اوچون دعوت ائتدی.
داها سونرا، هوشیار، ثمینه باغچه‌بانین “گلین تورکجه دانیشاق” آدلی کتابینین تبریزده چاپ اولونماسینی تکلیف ائتدی کی داها چوخ اوخوجو بو ماراقلی و طنزله دولو اثریندن فایدالانسینلار.
او بو باره‌ده علاوه ائتدی: تبریز، بیرینجی لر شهری‌دیر، بو شهرین بیرینجی لریندن بیرینین قیزی اولاراق، کتابینین دوغما شهرینده چاپ اولونماسی بیزلری سئویندیرر
ثمینه باغچه‌بان دا بو ده‌یَرلی گؤروشدن چوخ شاد اولدوغونو بیلدیریب دئدی: بو گؤروش منیم اوچون تاریخی و روحیه‌وئرن بیر گوندور. تبریز همیشه منیم اوچون خاطیره‌لی بیر شهردیر و بو گؤروش منی آتامین یادینا و آتا یوردونون حسرتینه سالدی.
او علاوه ائتدی: تبریزده و او شهر ده عائله‌مین یانیندا کئچیرمیش زامانلار منیم اوچون همیشه ده‌یَرلی بیر خزینه‌دیر.
او تأکید ائتدی: ترکی ادبیاتی منیم اوچون همیشه دَیرلی معنادا و عمقلی مفاهیمین منبعی اولوب و ترکی شعرینده انسان عمقلی مفاهیمه و اؤزل گؤزه‌للیکلره چاتا بیلر.
ثمینه باغچه‌بان ترکی ادبیاتینین همیشه اونون اوچون خاص و جذاب معنالاری اولدوغونو بیلدیریب، مشهور ترکی شعرلریندن بیرینی اؤزونه مخصوص سس ایله اوخودو: “محبت بیر بلا شئی‌دیر گرفتار اولمایان بیلمز”،
او داها سونرا علاوه ائتدی: “آرزوم بودور کی بیر گون یئنه تبریزه، دوغما شهریمه قاییدام. تبریز همیشه منیم اوچون عشق و خاطیره‌لرله دولو بیر شهردیر.
بو گؤروشون سونوندا، تبریز بلدیه رئیسی، ثمینه باغچه‌بانین حیاتی و آتاسی جبار باغچه‌بانین اَل‌یازیلاری حاقیندا بیر فیلم مستندی چکمک تکلیفی وئردی. بو تکلیف ثمینه باغچه‌بان طرفیندن قبول ائدیلدی.
برچسب ها :تبریز بلدیه رئیسی، جبار ، ترکی آذربایجانی ، ثمینه باغچه بان ، جبار باغچه بان ، گوروش
- نظرات ارسال شده توسط شما، پس از تایید توسط مدیران سایت منتشر خواهد شد.
- نظراتی که حاوی تهمت یا افترا باشد منتشر نخواهد شد.
ارسال نظر شما
مجموع نظرات : 0 در انتظار بررسی : 0 انتشار یافته : ۰