بیرلیک و وحدت تبریز توسعه سینین مهم ضرورتی دیر / مجلس، شهر اداره چیلیگی ایله تعامل ائتمک ده مصمم دیر

مسعود پزشکیان آرتیردی: شورا عضولری، بلدیه، مجلس نماینده لری و باشقا اجرایی مسئولارین بیر یولدا و بیر آماجدا حرکت ائتمه سی، حتما شهرین چئشیدلی چتین لیک و مسئله لرینه آرادان قالدیرماسینا و تبریزین مختلف اجتماعی و مدنی ظرفیت لرینین گؤسترمه سینه مثبت و تاثیرلر ایز بوراخار.

پزشکیان آرتیردی: تبریزین اداره سینه، مختلف ارگانلاری بیر بیری ایله ارتباط و تعامل یاراتماقدا باجاریقلی بیر اولگو و نمونه تعریفله مه لیدیرلر. بو اولگو، شفافلیق، مشارکت، مسئولیت قبول ائتمک و جاواب وئرمه و بونلارلا برابر بوتون اهالی و بوتون سیویل انجمن لرین ظرفیت و گوجلرین دن فایدالانماق کیمی قابلیته مالک اولمالی دیر.

تبریزین اسلامی شورا مجلسینده کی وکیلی بوتون نماینده لرین خالقا و شهره خدمت ائتمک ده بیر اورک لی اولدوغونو وورغولایاراق آرتیردی: بو چوخ سئویندیریجی دیر کی تبریز نماینده لرینین ایکی سی مجلسین هئیت رئیسه سینده یئر آلیب لار. بو مسئله تبریزین یئرینی مجلس تصمیم لرینده داها دا اهمیتلی قیلیب دیر. البته بیز بو ظرفیت دن شهره و اهالی یه خدمت ائتمک اوچون استفاده ائتمه لییک.