بودجه و اعتیبارلارین حیاتا کئچیریلمه یولوندا اساس باسقی و فیشاری اینسانلار داشیییرلار

آی نیوز– تبریز شهرینین اسلامی شوراسینین عضوو دئدی: قانونلاشدیریلان و نظرده توتولان شهری، میللی و استانی بودجه ده، ائله بیر حرکت لازیمدیرکی باسقی نین چوخونو اینسانلار داشیماسینلار.

امیر حقیان دئدی: تأسوفله بودجه نین قانونلاشدیرما یولوندا ائله عمل اولونورکی اساس باسقی و فیشار اینسانلارین بویونونا دوشور حالبوکی اینسانلارا دایانیلان بو فیشارلارین قاباغینی آلماق اوچون نظرده توتولان ثابیت گلیرلرین تأمین اولونماسی لازیم دیر.

او همچینین بونا ایشاره ائده رک کی شهرین اداره ائتمه سی اوچون شهرین ایچینده اولان حبس خانا و پادگانلارین شهرین ائشیینده اولماسی بیر حقوقی طلب ساییلیر، لازیم اولان اؤزه ل اعتیباری بو ایشین ایجراسی اوچون ایسته ییب دئدی: تأسسوفله بلدییه یه بو مسئله اوچون هئچ  بیر اعتیبار نظرده آلینماییبدیر.

امیر حقیان سؤزلرینین باشقا بؤلومونده تبریزین و استانین مدنی ثروتلرینه اؤنجه لردن داها چوخ دیقت ائتمه لرینی وورغولاییب دئدی: تبریز باشقا شهرلر او جمله دن اصفهان شهریندن  داها چوخ تاریخی و مدنی ثروت لره مالیک دیر آما مدنی میراث مجموعه سینه وئریلمه  ین اعتیبار و بودجه لر اوزوندن، تبریزین تاریخی اثرلرینین یئنی دن دوزلتمه و تعمیر ایشلرینین بیر حیسه وظیفه لرینی بلدییه بویونونا آلیب دیر.

او اؤلکه وزیرلیییندن خلجان، کوجوار، آنا خاتین کندلری و تبریز شهرینین چئوره سی و شخصی یئرلرینین دوروملارینین یئکونلاشماسینی ایسته دی.