محسن رضایی :من هئچ بیر ائتلاف دا اولمایاجاغام/ ائتلافیم یالنیز میللت له دیر

دکتر رضایی نین بیلگی یایان سیته سینین خبرینه اساسا، “نظام مصلحتین آیدینلادان مجمعین” باش کاتیبی تبریز شهرینه ائتدیی بیر گونلوک سفرده ژورنالیست لرله دانیشیقدا دئدی: من آذربایجانی سئویرم و واخت تاپدیقجا بورایا گلیب آذربایجانین قهرمان خالقیلا گوروشه رم.
رضایی دئدی: من مقدس دیفاع ایللرینده آذربایجانلی قهرمانلاردان چوخلو خاطیره لریم وار. بوراسی مهدی باکری، ستارخان، باقرخان، شهریار کیمی بویوک اینسانلارین مسکنی اولموش. من بو توپراغا اوزل حورمتیم واردیر.
رضایی آذربایجانا ائتدیی سفرین اصیل ندنی نی بورانین میللتی و نخبه لری ایله گوروشمه سی بیلدیریب دئدی: انقلاب رهبرینین سیاسی و اقتصادی حماسه حافیندا دئدیی بیاناتلارا اساسلاناراق بیزیم وظیفه میز داها آرتیق خالقین آراسیندا اولماق دیر.
 رضایی آرتیردی: بو ایل چتین شرایط اولکه یه حاکیم اولوب دور  و یالنیز ایش بیرلیگی و آچیق گوزلولوکله بو دوراندان کئچمک اولار .
نظام مصلحتین آیدینلادان مجمعین باش کاتیبی دئدی: منجه آذربایجانین ظرفیت لریندن یاخشی یارارلانمامیشیق. آذربایجان هم میللی و هم بین الخالق ساحه لرده اونملی موقعیته صاحیب دیر و بوندان داها یاخشی یارارلانماق اولار.
رضایی دئدی: شرقی آذربایجان منطقه نین اقتصادی قطبونا چئویریله بیلر و شرقی آذربایجان شمالغربین کولتورل و سیاسی مرکزیتی اولدوغونا اساسا، بوراسی بوتون ایرانین دیرچلیشینده اونملی رول اوینایابیلر.
رضایی ائتلاف لار حاقیندا آرتیردی: بیز گرک میللتین بیرلیگی و ظفرینه چالیشاف و بونا اساسا ائتلاف لار احتمالا تفرقه یه سبب اولا بیلر. منجه میللت له ائتلاف ائتمک ایندیکی زاماندا هر نه دن اونملی دیر.