قم، گؤیلره یوکسلن آهلارین شاهدیدی؛ میلیونلار شهید رهبرله ویداع ائتدی

آی نیوز – تهرانداکی ایکی گونلوک وداع و تشییع مراسیملریندن سونرا، شهید رهبریمیز حضرت آیت الله العظمی سیدعلی خامنه‌ای (ره) و عائله عضولرینین پاک نعشلری قم شهرینه یوللانمیشدی کی، قم اهالی سی ده اؤز رهبرلرینه سون ویداع ائتسینلار.

مراسیمین ان اونملی حیصه‌سی صبح ساعاتیندا مسجد مقدس جمکراندا باش وئردی. آیت‌الله جوادی آملی نین ایمامتینه میلیونلارلا اینسانین قاتیلیغی ایله اقامه اولونان ناماز میت، بو تاریخی گونون ان تیتردیجی آنلاریندان بیری ایدی. بیر آغیزدان یوکسلن تکبیر سسلری، مسجدین گونبزینی و قمین گؤیلرینی تیترتمیشدی. بو ناماز، ساده‌جه بیر دینی مراسیم دئییلدی؛ بیر میلتین اؤز رهبرینه سون بورجونو ادا ائتمه‌سی، بیر اومّتین یاس و ماتم ائتمه‌سینین ان درین گؤستریجیسی ایدی.

نامازدان سونرا، پیکر مطهرین تشییع مراسیمی باشلادی. استاندار قم، اکبر بهنام‌جو، اعلام ائتمیشدی کی، تشییع مسیری بلوار پیامبر اعظم (ص)‑دان حرم مطهر حضرت فاطمه معصومه (س)‑ه قدر اولاجاق. لاکین، خالقین ایستقبالی او قدر بؤیوک اولدو کی، مسیر بویو مینلرله اینسان صف دوزموشدو. رسمی خبرلره گؤره، مراسیم میلیونلارلا اینسانین قاتیلیمی ایله کئچدی. قم کوچه‌لری، سیاه‌پوش بیر دنیایا چئوریلمیشدی. هر یاشدان اینسان، گؤز یاشلاری ایله، ال‌لرینی گؤیه قالدیریب، رهبرلرینه سون باخیشلارینی تیکیردی. «یا حسین» نادالاری، آه-فریادلار و مرثیه‌لر قمین سکوتونو پارچالامیشدی.

گون بویونجا، پیکر مطهرین حرکتی داوام ائتدی. حرم حضرت معصومه (س) اطرافی، ایزدیحامین سیخلیغی سببیندن، بیر نؤقطه‌ده کئچیلمز حده چاتمیشدی. نظم-نظام قووّهلری، جمعیتی ایداره ائتمک اوچون تام حاضرلیق وضعیتینده‌ایدیلر. بیر چوخ زوار، گئجه‌نین قارانلیغیندان بری مسجید و حرم اطرافیندا توپلاشمیشدیلار کی، بیر لحظه اوْنون یانیندا اولا بیلسینلر. بو گون، قم تاریخینده‌کی ان بؤیوک ایجتماع اولاراق حافظه‌لره حَکّ اولوندو.

گونون سونونا یاخین، تشییع مراسیمی باشاریلا سونا چاتدی. نعش مطهر، سونراکی مرحله‌لر اوچون – عراق شهرلری نجف و کربلا و سونرا مشهد مقدسه آپاریلماق اوچون – حاضیرلاندی.

قم شهری میلیونلارلا ماتمدارین آه-فریادینا شاهد اولدو. شهید رهبریمیز، بو شهرین تورپاغیندا دا بیر اومّتین اورگینی بیرلشدیردی. بیلین کی، بو ویداع بیر سون دئییل؛ بیر یئنی باشلانغیجدیر. شهید رهبریمیزین یولو، یولوموز اولاجاق. اونون خاطره‌سی اورکلیمیزده یاشایاجاق. بو ماتملی گونلرده، بیرلیگیمیز، قارداشلیغیمیز و باغلیلقییمیز داها دا آرتاجاق. روحو شاد، یولو راهی اولسون!