تبریز- سهند اتوبانین قورتاریلما طرحی

آی نیوز-شرقی آذربایجان والیسینین عمران معاوینی بئله دانیشدی:

تبریزین باش اداره چیسی نین برنامه لرین باشیندا تبریز- سهند اوتوبانی عملیاتی و یولون تاماملانماسینین سورعتلندیرمه سی سهند و اسکو شهرستانینین ساکینلری و شهرده گل – گئدین آسانلاشدیرما پروقراملاری یئرله شیر.

استانین یول و شهر سالما اداره سینین اجتیماعی ایلگی لرینین وئردییی معلوماتا گؤره محمد صادق پور مهدی بو اوتوبانین تیکینتی عملیاتی گؤروشونده بیان ائتدی: بو یولون اهمیت و ضرورتینی نظرده آلاراق شرقی آذربایجان استانداری  سینین (والیلییینین) اینکیشاف معاوینی و استانین باشقا ارقانلاری بو اوتوبانین تئزلیکله قورتاریلماسینا و عملیاتینین سونا چاتماسینا بوتون گوجلریله جهد ائده جکلر..

او بو پلانی دوزنله ین اینسانلارین ایشینی یوکسک قیمت لندیریب  مسئوللارین جهد و فعالیت لرینین سورعتینی آرتماغی ایسته ییب بو ایشین تاماملانماسینی وورغولادی.

پور مهدی سهند شهرینین ساکین لرینین گل- گئت ده اولان پروبلئملرینه و بو یولدا اولان  سوروجولوک قضالارینین باش وئرمه سینه ایشاره ائده رک تبریز- سهند اوتوبانینین اهمیت و تأثیرینه پروبلئملرین آزالیب آرادان قالدیریلماسینی خاطیرلاتدی.

تبریز- سهند اوتوبانی ۲۲ کیلومتر اوزونلوغوندادیرکی یول و شهر سالما اداره سینین توسطیله تبریز طرفیندن ۱۵ کیلومتر اوزونلوقلا ۴۵ فایز فیزیکی ترقی ائدیب و سهند شهرینین آبادانلیق شرکتینین توسطیله، سهند شهری  طرفیندن ۷ کیلومتر اوزونلوقلا ۷۰ فایز فیزیکی ترقی ائدیب دیر و دوزنیلمک حالیندا دیر.