«بوشانما جشنی» آدیندا عجیب واقعیت!

ائوده، تالاردا و یا لوکس بیر باغدا اوستلرینده جوربه‌جور میوه، شیرنی و شربتلر دوزولموش طمطراقلی میزلر دوزولوب. سالونون باشیندا موسیقی گروهو اوچون یئر نظرده آلینیب و شاد اوخوماقلار اوخونور.

گؤرورسن بیر شاما دعوت اولورسوز و احتمالاً شامدان سونرا قوناق صاحبی زوج میکروفون دالیسنا کئچیب ائولی‌لیقلاری‌نین باشا چاتدیقلارینی اعلام ائلیرلر.

سونرا سیزین حیرتلی باخیشلاریزین قاباغیندا بارماقلارینداکی اوزوکلری چیخاردیب اونلاری چکیش و یا آیری وسیله اینن معدوم ائلیر و گوله گوله بیر بیرلریندن آیریلیرلار. بلی بو قوناقلیغین آدی «بوشانما جشنی» ایدی.

بو بوشانما جشنی هاردان چیخیب؟

بوشانما جشنی اوّل دفعه آمریکادا قورولوب. آمریکا روانشناسلارین نظرینه گؤره بو جشن، آیریلیغین آجیسینی آلماق اوچون لازم جشندیر. آما یاواش یاواش لوکس بیر قوناقلیغا چئوریلدی و ماهیتینی الدن وئردی.

آیری لوکس شئیلر کیمی‌ده بو جشن بیزیم مملکته یول آچدی. بئله بیر مراسمین بیرینجی رسمی خبری ایراندا ۸۸-جی ایلینده روزنامه‌لرده درج اولدو. مسأله او قدر بویودو کی حتی نماز جمعه‌لرده و مجتهدلر سطحینده اونون علهینه تنقیدلر یاغماغا باشلادی.

بئله بیر جشنین عینی شاهدلرین بیری‌ بئله دئییر: دوستوم الهه‌نین ائولنماغی ایلی آشمادی. تویلاریندان نئچه آیدان سونرا اونلارین بوشانما دعوتنامه‌سی تلگرام حسابیمیزا گلدی. الهه‌دن بوشانما سببینی سوروشاندا دئدی: حیات یولداشیمین روحی مشکلی واریدی و مندن گیزلتمیشدی.

دئمه‌لی‌یم الهه چوخ تر تله‌سیک ائولنمیشدی. خالاقیزیلاریندان سونرا ائوده قالمادیغینی و تحقیر اولمادیغینی گؤرستماق اوچون تحقیق ائله‌مه‌دن فوراً ائولنمیشدی.

ایندی‌ده بو جور تئز بوشناماسیندان اوتانماماق اوچون جشن توتموشدو کی اصلاً ناراحت اولمادیغینی گؤرستسین.

اونلار قوناقلیغا چوخ خرج قویموشدولار. دوزدو دعوتنامه کارتی چاپ ائله‌مه‌میشدیلر آما بیر کلیپ دوزلدیب تلگرام واسطه‌سی اینن دوست تانیشلاری بوشانما جشنینه دعوت ائله‌میشدیلر.