امروز با سحر خانم / هانسی یوللاردان گلیرسن

سیغماییر ایستـکلریم منطقلرین ارکانینا

ایسته ییر  عنوان اولوم دیوانه لر دیوانینا

سن آچان گونــدن قاپانمیش یوللاری رؤیالره

مین دیلک ایلمک له نیر هردم کونول دامانینا

هانسی یوللاردان گلیرسن گؤیده اولدوزلار گولور

چن دوشور حسرت قباسیندان باخیش میـدانینا

سن دوننلر باغــچاسیندا اکدیگیم بیر آرزوسان

گئج بئجردین دوشمدی کؤلگن گؤروش ایوانینا

دامجی-دامجی قان دامیرکن، قلبیمین پیمانه سی

دالـــغا-دالـــغا یوکســلیر میــدان وئریر طوفـانیـــــنا

قوی اؤره ک دریای عشق اولسون،بوتون وارلیق کیمی

قــــوی چئویرسین  دالغـــالار دونیـــانی قان عمــــانینا

سحرخانیم

حیاتی

سحر خانیم، ۱۳۳۱-جی ایلده اردبیل شهرینده دونیایا گؤز آچمیش و همین شهرده بویا-باشا یئتیشمیشدیر. سحر خانیم آذربایجان ادبییاتیندا اؤزونه عایید یئر آچان شاعیرلر سیراسیندادیر و ایلکین شعر توپلولاریندا ادبی دیل ایله دانیشیق دیلینی باریشدیرماغا چالیشمیشدیر.

بۇ سبب‌دن ایستر آذربایجان تورکجه‌سینی ادبی دیلده یازماغی ساوونانلار طرفیندن، ایستر دانیشیق دیلده یازیلماسینین یانینی توتانلار طرفیندن ده، شعرلری سئویلیب و آلقیشلانمیشدیر.
اثرلری

سحر خانیمدان بورا قدر دؤرد شعر توپلوسو ایشیق اوزو گؤرموش کی بونلاردان عیبارت‌دیرلر :

ماویلر
یاشیل ماهنی
آیلی باخیش
بیر دسته تزه گونش

ائله‌جه “حکایت در” آدلی بیر فارسجا شعر توپلوسو و “قوسی تبریزی دیوانی”نین تصحیحی ده سحر خانیمدان یاییملانمیشدیر.

آی نیوزا یازین امروز با سحر خانم /

معاصر شاعرلر ایله تانیشماق و اونلارین دویغو دولو شعر لرین اوخوماق نیت ایله آی نیوز هر گون بیر شاعیردن بیر شعر یایماق نیتینده دیر. ()