کد خبر : 35151

تاریخ انتشار : سه شنبه 24 بهمن 1402 - 7:39

آی نیوز – اوستاد یحیی شیدا آذربایجانلی آدلیم ژورنالیست، شاعیر، ادیب و یازیچی ایدی.

آی ساری کوینک

آی خسته قوش آواره گزیرسن بو دیاری
زنداندی قفسدی چمنی باغی باهاری

گوزله اوزوی آوچی دیر هریانی بویوردون
قوزغون کیمی دوردگوزلوگزیرکورپه شکاری

فرصت دالیسیجا گزیری ال یئری تاپسا
ویران قویاجاق یوردونو آی کوینگی ساری

تیک اوز یووانی قویما سنه ال تاپا اووچی
سن بو یووانین صاحبی سن قان یئنه باری

جهد ایله کی جان قورتاراسان اووچی الیندن
دوشسن تورا فریاد ائله مه چک بو فشاری

گولشنده کی یوخ ذوق و صفا آی ساری کوینک
قاچ قاچ بو یئرین زهریلیدیر داری نداری

دیلله نسن اگر اووچی ائدر قانینا قلتان
اوچسان آ یازیق تیر جفا قلبینی یاری

مین فیرتینا قالخیب دویه جک باشینا طوفان
هر کیمده اولا داغ کیمی دونیادا وقاری

گلسه باشیوا درد و بلا داغ کیمی دور باخ
آیدیندی بو سوز توستو گئده ر گویچگه ساری

ایستر سنی صیاد اوزونه رام ائده اما
ایغو دو گوره ر آج تویوغ البته کی داری

بو یاخشی مثل دیر کی بیزم ائلده دئمیشلر
بیر باخ آشاغی باخما اوزوندن ده یوخاری

غم غصه کیچیک قلبینی کر دویسه سیخیلما
بو گوند ه کئچر آخیری غملر ده قئتاری

اوندا کی چیخار گون یاییلار عالمه بیردن
اوندا کی قارا دان یئری صبح اولجاق آغاری

داغی داشی آسوده خیالیله گزه رسن
گولشنده نه شاختا گوره سن داغدا نه قاری

ظولمون ائوی ویران اول و ظالیم دوشر الدن
قان دورماز اگر کسه پیچاق قیرسا داماری

بختین قاپیسی ایندی قیفیللانسا داریخما
هر بیر قیفیلین واردی طبیعت ده آچاری

اوز جانیویلن اوناما بو عرصه ده شیدا
لیلاج دغلبازیله قیزدیرما قوماری

یاشامی

آذربایجانیمیزین فخری ساییلان استاد یحیی شیدا ۱۳۰۳نجی ایلین اردیبهشت آیی‌نین ییرمی‌سینده تبریز شهرینده مشروطه مجاهدلریندن اوْلان حاجی حسین‌چرندابی (یوزباشی) عائله‌سینده دونیایا گؤز آچدی. شیدانین ایلک مۆعلیمی «میرزا خانم» آدلی اوْلموش، اونا قرآن کریم و جامع عباسی‌نی اؤیرتمیشدیر. اونونلا یاناشی، بالاجا یحیی اؤز آتاسیندان، کلیله و دمنه، گلستان، بوستان، قابوسنامه، نصاب‌الصبیان و … اؤیرنمیشدیر.

ابتدایی تحصلینی جامی مدرسه‌سینده و اوْرتا مکتبی‌ایسه فردوسی دبیرستانیندا ادبیات رشته‌سینده قورتاریر و عرب دیلینی مکمل اؤیره‌نیر. ائله بۇ زاماندان فلسفه، روانشناسی و عرفان موضوعلارینی دریندن مطالعه ائتمگه باشلاییر.

شیدانین شعر ذوقو ۱۳۱۹نجی ایلدن چیچکلنیر و او بۇ یولدا علی‌فطرت، جعفر خندان و مولانا یتیم کیمی تانینمیش ادبیات اوستالاریندان شاعرلیگین تکنیک‌لرینی اؤیره‌نیر. اونلارلا برابر معانی و بیان علملرینی تبریزین جمعه مسجیدینده استاد انصاری‌دن درس آلیر.

۱۳۲۴نجی ایل آذربایجاندا باش وئرن حرکات، گنج شیدانی‌دا اؤزونه جذب ائدیر. شیدا شاعرلر مجلسی‌نین فعال عضوی کیمی بۇ ادبیات اوجاغیندا شرکت ائدیر و اودلو آلوولو شعرلریله چیخیش ائدیر. شیدانین جوان اوْلدوغونا باخمایاراق، شاعرلر مجلسینده گؤزل شعرلر مولیفی اوْلدوغونو هامی قبول ائدیر.

۱۳۲۷نجی ایلدن مطبوعاتی چالیشمالارا باشلاییر و بیر چوخ مقاله‌لر خاور نو، آذرمرد، اخبار روز و … دیگر روزنامه و مجله‌لرده یازیر. بۇ ایللرده تهرانا گئدیر و اوچ ایل اوردا عرفان اسلامی اوخویوب، مطبوعات ایشلریله مشغول اولور. شیدا تهراندا اولارکن مۆختلیف ادبی انجمن‌لرده او جمله‌دن انجمن ادبی دانشوران‌دا اشتراک ائدیر و نیما یوشیج، اخوان ثالث، ناصح، بدیع‌الزمان و بیر چوخ فارس شاعرلریله یاخیندان علاقه‌ده اولور.

۱۳۳۰نجی ایلرده تبریزه قاییدیب، حرفه‌ای بیر ژورنالیست کیمی مطبوعاتی فعالیت‌لرینه دوام ائدیر و ادبی انجمنلرده فعالیت گؤستریر. شیدا بۇ ایللرده سهند، حبیب ساهر، حسن قاضی، احمد ترجانی‌زاده، واعظ چرندابی، ادیب توسی، دکتر منوچهر مرتضوی، استاد شهریار و … دوستلوق ائدیر.

۱۳۴۰نجی ایللردن «مهد آزادی» روزنامه‌سی‌له امکداشلیق ائدیر و بۇ امکداشلیق اوزون ایللر و بۇ گونه قده‌ر دوام تاپیر.

استاد شیدا اؤزو دئمیشکن ایران آذربایجانیندان داها آرتیق آذربایجان جمهوریسینده و ترکیه‌ده تانینیر و اونون بۇ ایکی اؤلکه‌ده بیر چوخ اثرلری دفعه‌لرله یاییلیبدیر.

استادیحیی شیدا مطبوعات عالمینه سیغمایان انساندیر. او مطبوعات ایشلریله برابر بیر مدت رادیو وئرلیشلری حاضیرلاییر و اؤزوده بۇ وئرلیشلرین آپاریجیسی اولور.

اونون آنا دیلینده و فارس دیلینده یازدیغی شعرلر مۆعاصیر ادبیاتیمیزین ان گؤزل نمونه‌لریندندیر.

استاد شیدانین ۱۸ مین بیت ترکی و ۲۲ مین بیت فارسی شعرلری واردیر.

اوستاد یحیی شیدا، ۱۳۹۰ نجی ایلین مهر آیی‌نین سو گونونون آخشامی (گون تاریخی۲۹)، تبریزین طالیقانی خیاوانیندا اؤز شخصی ائوینده، دونیاسینی ده‌ایشدی. بۇ ادیب‌ین پیکری، تبریزین ۲۹ بهمن فرهنگی-هنری مجتمع‌ینین قاباغیندان هونرمندلر قطعه‌سینه طرف تشییع اولوندو.