پروین اعتصامی هانسی گون دونیایا گوز آچدی

”پروین اعتصامی“ 1285-‌‌ نجی ایلین اسفند آیی‌نین 25- ینده تبریزده دونیایا گؤز آچدی. اوشاق‌ایکن آتاسی ایله بیرلیکده تهرانا کؤچوب، فارس و عرب دیل‌لرینی آتاسینین یانیندا اوخویوب، اینگلیسجه‌نی آمریکالی‌لارین تهراندا کی قیز مدرسه‌سینده اؤیرندی.
اونون آتاسی ”یوسف اعتصامی“ بؤیوک ادیب و بیلگین بیر یازیچی‌ایدی. بونونلا دا پروین ائله اوشاقلیق چاغلاریندان شعر و ادبیاتلا تانیش اولدو.
پروینین دولغون شعرلری اوخوجویا بؤیوک تاثیر قویاراق، حیاتین شیرین‌لیک و آجی‌لیق‌لارینی تانیتدیریب، اونو آرتیق دوشونمه‌یه چاغیریر. اعتصامی‌نین شعرلرینی اوخویارکن سانکی اؤلکه‌نی کوچه – کوچه، قاپی – قاپی دولانیر، توزلو تورپاقلی کوچه‌لردن سوووشور، سوواقلی داخمالاردا قوناق اولور، چیلپاق اوشاق‌لارلا گؤروشور، یوخسول آتالارلا دردلشیر، میسکین یئتیم‌لرین گؤز یاشلارینین، ییرتیجی شاهلار
تاجینین پاریلداماسینی آیدین گؤرورسن. پروینین شعرلری گئرچک‌لری عکس ائتدیرن جانلی تابلولار کیمی تصویر اولونموش‌دور.
کیچیک یاشلاریندان ادبیات وورغونو اولوب شعر سؤیله‌مه‌یه باشلایان پروینین آرتیق چیخارلی اولدوغو بللی‌ایدی و آتاسینین گؤروشونه گلن عالیم‌لر اونون چیخیشلاریندان حیرته دالیردیلار. پروین 1313 ده آتاسینین عمواوغلوسیلا ائولندی، آما بو ائولنمه اینجه خیال شاعیرین لطیف دویغوسویلا توتمادیغینا گؤره ایکی آی یاریم‌دان آرتیق داوام گتیرمه‌دی.
چوخ آز زامان‌دا ایرانین باشاباشیندا تانینیب شهرت قازانان بؤیوک شاعیر 1320- نجی ایلین فروردین آیی‌نین 15- نجی گونو، 12 گون خسته‌لیکدن سونرا دونیادان کوچدو. اونو قم شهرینده آتاسینین مزارینین یانیندا تورپاغا تاپشیردیلار.

شاه و یئتیم اوشاق
بیر کوچه‌دن کئچیردی جلالیله شهریار
های‌– کوی اوجالدی، اولدو او گون شنلیک آشکار
وئردی سوال، داغلی یئتیم اؤز هاماشینا
بو گؤز قاماشدیران نه‌دی شاهین تاجیندا وار؟
وئردی جواب: بیلمیرم، آنجاق ائشیتمیشم
ارزشلی اینجی‌دیر باشا قویموش او بختیار
گئتدی قاباغه بیر قاری عورت، دئدی بئله:
گؤز یاشی‌دیر! اورک قانی‌دیر، اولسان هوشیار
بو قورد کی، بیزلره تانیش اولموش بیر عؤموردور
دایم فلاکته سورونو ائیله‌ییب دوچار
عارف کی ییغدی ثروت و دولت ”حرامی“ دیر
بیر شاها کی، مولک آل – وئر ائده ائتمه اعتبار
دقتله گؤر یئتیم‌لرین قانلی گؤز یاشین
بو گوهرین پاریلداماغین آنلا کم عیار
”پروین“ یالان دئینلره دوز سؤز نه بهره‌سی
کیمدیرکی دوز دانیشماغینا ائتسین افتخار؟