کلاه فرنگی یوخسا کوله فیرنگی؟

کلاه فرنگی یوخسا کوله
صرافی: قدیم تبریزده و عمومیتله آذربایجاندا و ایراندا بیر نوع آوروپا معمارلیغیندان الهام آلینمیش بینالارا کوله‌فیرنگی دئییلر.

آی نیوز – مهندس علیرضا صرافی، «کلاه فرنگی» ترمینی حاقدا بئله دئدی: کوله (küle) اطراف بنالاردان داها اوجا و اونلارا اشرافی اولان عموما استوانه یا دا نئچه‌ضلعلی بینالاردیر.  هم ده حتی بؤیوک بیر عمارتین ان اوجا تیکیلمیش و معمارلیغیندا داها سمبلیک رول اوینایان بؤلومونه ده «کوله فیرنگی» دئییلیب.

مثلا؛ شمس‌العماره‌نین کوله‌فیرنگیسی دئیینده شمس‌العماره بناسی‌نین ایکی قات داها اوجایا قالخان اورتا بؤلومو قصد ائدیلیر.

تبریزده کوله فیرنگی دییه بیر چوخ عمارتلر قاجار زمانی تیکیلمیشدیر. باغشومال یا شازدا باغینداکی عیمارت ده بو کوله فیرنگیلردن بیریسیدیر.بونلارا تای استانبولدا قیز کوله‌سی، قالاتا کوله‌سیندن آد آپارماق اولار.

فارسجایا گلن کوله فیرنگی ترمینی «کلاه فرنگی» املاسی‌یله ثبت اولوب.  بیزیم تورکجه دانیشیق و یازیلاریمیزدا یئنی‌جه بلدیه طرفیندن احیا اولان او بنانی مطلق کوله‌فیرنگی küləfirəngi کیمی یازیب اوخومالییق . تورکجه یازاندا و دانیشاندا اونو کلاه فرنگی kolah ferəngi کیمی یازیب اوخومامیز تمامیله یانلیشدیر.

 

 

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *